The Oxfordshire

Ferðin var frábær í alla staði – geggjað veður – völlurinn alveg frábær og í góðu ástandi – allt svo snyrtilegt. Hótelið var mjög gott – góð rúm – góður matur og góð þjónusta.

Ég lék golfvöllinn fyrir rúmum áratug og heillaðist af honum. Endunýjuð kynni staðfestu að völlurinn bauð upp á allt sem mig minnti og meira til. Einn helsti kostur hans, fyrir utan snyrtimennsku og sanngjarnt skipulag sem hentar kylfingum á öllum getustigum, er fjölbreytileikinn. Fáir vellir sem ég hef leikið hafa jafn margar eftirminnilegar holur. Í mínum huga sameinar golfvöllurinn tvo heima – hann ber augljós merki amerískrar hönnunar, umvafinn gullfallegri enskri sveit.

Ótrúleg fjölbreytni á skemmtilegum golfvelli, einum þeim skemmtilegasta sem undirritaður hefur leikið.

The Oxfordshire er mjög flottur völlur og í topp standi. Veðrið var 20 gráður og sól allan tímann. Örugglega besta ferð okkar félaganna.

Það er búið að setja mikla peninga í þennan völl og hann er einstaklega skemmtilegur. Þegar ég spilaði hann síðast þá spilaði ég einnig Stoke Park og The Grove í sömu ferð. Það er skemmst frá því að segja að The Oxfordshire var betri en hinir tveir þó um ofurvelli sé að ræða. Þó að komið hafi verið fram í nóvember voru flatirnar í fantaformi. Þetta segir manni að The Oxfordshire er svokallaður „must play“ völlur.

Hönnuður vallarins, Rees Jones, hefur hannað og endurhannað ótal velli. Hann hefur m.a. endurhannað ofurvelli á borð við Bethpage, Torrey Pines, Medina, Baltrusrol, Congressional og Hazeltine.