Lingfield Park Marriot Hotel & Country Club er frábær áfangastaður fyrir kylfinga. Hótelið opnaði í maí 2010 og samhliða því var tekið í notkun nýtt klúbbhús ásamt mjög góðu æfingasvæði. Um er að ræða 4 stjörnu hótel, með mjög góðum 18 holu golfvelli á landareigninni. Völlurinn er frá árinu 1987 og liggur á 200 ekru landareign í Surrey.
Völlurinn er fjölbreyttur, par 72 og er rúmlega 5900 metrar að lengd. Talsverður munur er á fremstu og öftustu teigum, til að mæta þörfum golfara af öllum getustigum. Í þrjú ár í röð hefur Surrey PGA Open verði haldið á vellinum, síðast í ágúst 2011. Aftan við hótelið er einnig veðhlaupabraut, þar sem haldnar eru veðreiðar nánast alla laugardaga árið um kring. Veðhlaupabrautin er sú eina á London svæðinu, sem er nýtt allt árið um kring og því eru mjög skemmtilegir viðburðir þar, sem trekkja að og skapast skemmtileg stemning. Þetta býður upp á ýmsa möguleika, t.d. fyrir hópa. Auðvelt er að fara inn til London með lest, sem gengur frá Lingfield (1,1 km) og tekur um 1 klst. alla leið inn í miðborg London.