Kempinski Hotel Das Tirol

Það er búið að "dumpa" niður snjó fyrstu tvo dagana - samt frábært að skíða en skyggnið lítið - í dag og næstu fjóra daga verður algjört bongó og snjórinn er klikkaður - brekkurnar fjölbreyttar, nóg af óskíðupum "off-piste" brekkum og ressarnir frábærir - alveg fullkomið

Algjörlega frábært skíðasvæði, að okkar mati eitt það besta í Evrópu og höfum við skíðað víða. Brekkurnar eru óendalega góðar og nægur var snjórinn, fengum reyndar einn dag sem datt út hjá okkur vegna snjókomu. Við nutum þess engu að síður að vera á staðnum þ.e.a. á þessu stórglæsilega hóteli. Notuðum veitingahúsalistann þinn og hann steinliggur. Takk fyrir öll liðlegheitin og ábendingarnar, nú er bara spurning hvert maður fer næst

„Þetta var alveg frábær ferð, gæti ekki verid ánægðari með þetta, sama gildir um betri helminginn. Hótelið, skíðasvæðið og frábært aðgengi ad öllu (að komast í kláfinn og allt það). Mæli hiklaust med þessu! Takk kærlega fyrir okkur, algert æði!“

Kitzbühel er klassi og allt það sem þið mæltuð með. Hótelið er það flottasta sem ég hef dvalið á í skíðaferðum víðs vegar. Kærar þakkir fyrir góða ferð og góð ráð. Mjög eftirminnileg ferð

Kempinski Hotel Das Tirol á skíðasvæði Jochberg og Kitzbuhel er frábært skíðahótel. Við fjölskyldan nutum þess að dvelja á þessu fallega og fjölskylduvæna hóteli sem býður upp á þægindi, lúxus og frábæra þjónustu. Stutt og fljótlegt að komast í brekkurnar frá hótelinu, frábært morgunverðarhlaðborð, þrifarlegt, huggulegt og sérlega ljúft að hafa aðgang að glæsilegu spa

Kempinski er flottasta skíðahótel sem ég hef dvalið á. Það hefur öll þau þægindi sem ég var að leita eftir. Rúmgóð herbergi, frábær morgunverður, æðislegt spa, skíðaleiga á hótelinu, lyfta við hliðina á hótelinu og hægt að skíða alveg heim, góður matur og mjög smart. Ég mæli hiklaust með Kempinski.

Nýji kláfurinn í Jochberg er einfaldlega stórkostlegur og með tilkomu hans 2014, hefur svæðið öðlast nýja ásynd. Það er vert að geta þess að 33 milljörðum ISK hefur verið varið í framkvæmdir við lyftur og fleira á skíðasvæðinu á undanförnum 15 árum.Geri aðrir betur.

Við hjónin dvöldum í góðu yfirlæti á Kempinski Hotel Das Tyrol í eina viku í febrúar. Þetta er er með bestu hótelum sem við höfum dvalið á, mjög rúmgóð nýtískuleg herbergi, frábær heilsulind, matur og öll þjónusta til fyrirmyndar. Skíðalyfta er við hlið hótelsins sem tengist síðan inná net skíðalyfta og skíðabrauta í nágrenninu. Í 10 mínútna göngufjarlægð frá hótelinu er þægileg gönguskíðabraut sem liggur niður til Kitzbuhel. Við getum svo sannarlega mælt með þessu hóteli og allri aðstöðu þar, það stendur vel fyrir sínum 5 stjörnum.

Þetta er eina "ski-in ski-out" hótelið í Kitzbühel sem veitir þér beint aðgengi að 55 skíðaliftum og 170 km af yndislegum skíðabrautum. Þetta 5 stjörnu lúxushótel er sérstaklega þægilegt fyrir fjölskyldufólk. Öll aðstaða til fyrirmyndar, stutt í skíðaskólann og lyfturnar bókstaflega við hótelið. Mæli með Kempinski Hotel Das Tirol fyrir þá sem vilja njóta þess besta sem austurrísku Alparnir hafa uppá að bjóða.

Svæðið samanstendur af þremur samliggjandi fjöllum KirchBerg, Kitzbühel og Jochberg. Kempinski hótelið er við botn Jochberg fjallsins. Að okkar mati er Jochberg hlutinn besti hluti svæðisins af ýmsum ástæðum. Þegar mikið er að vera á svæðinu þá vill það vera þannig að fólkið safnast saman í Kitzbühel hlutanum. Að auki eru brekkurnar að okkar mati betri í Jochberg en í Kitzbühel. Þær eru breiðari, lengri og það er einfaldlega stórfenglegra útsýni í þessum hluta fjallsins. Þó er vel þess virði að skíða Kitzbühel hlutan og einnig Kirchberg. Jochberg svæðið tengist Kitzbühel hlutanum með kláf sem heitir 3S.